etwas zu lachen:-P

A Schwob wird erschd mit vierzig gescheid,
an andrer ed en Ewigkeit.
A jeder hoffd, des Versle schdemmd,
dass oims no do des Brett weg nemmd,
mo manche vor de Auga hend,
ond vorem Hirn, s ischd grad so mend.
Ma moind, dass no an Schnaggler duad,
an Schugglar dat es grad so guad,
ma horchd ganz gschbannd so en sich nai,
ond iberlegt sich bei ma Wai,
wie schee des war, wenn ma ganz gscheid,
no gscheider wiea de andre Leid,
em Schwatza, Denka, Handla war,
no dat ma sich hald ed so schwer.
Mit allem, was mer macha miessd,
mer awwl allas besser wiessd.
No dat merns zeiga, daene Boss,
ond sass no selber auf em Ross,
dat schempfa, schreia, delegiera,
koin Fenger dat mer no mai riehra.
Mr hedd fuer allas saene Leid,
obs des fur ons wohl ao mol geid?
Aber was solls, s ischd bloss an Traum,
weil endra duad sich des wohl kaum.
Dr oinzich Goischd, mo en oin fehrd,
der kommt vom Wai, ond en sich herd
mr a Schdemm, i ischd ed zom Juchzga:
Menschenskind, du gohschd uff Fuffzga!